I februar henta politiet 21 etiopiarar til Trandum. Dei har vore i landet 10–22 år. Tre har til saman fem barn som er født i Noreg. Fem er kvinner, ei frå Florø, ei frå ­Tingvoll, to frå Trøndelag og ei frå Oslo. Onsdag 24. april starta tvangs­utsendinga. Då vart ­Mulalem Fekadu frå Modum sendt til Etiopia etter 16 år i Noreg. Han var 15 då han kom. På ­Trandum sit Alemayehu Hirpo (51), i 19 år har Ringsaker ­Mottakssenter vore heimen hans. Alemayehu Hirpo var ein populær og berømt musikar i Etiopia. Mange av tekstane hans handlar om fred og kjærleik mellom ­menneske. I Tingvoll spør folk etter 47 år gamle Woinshet Asefar, dei fleste kjente henne. Woinshet var viktig for mange menneske i lokalsamfunnet. Ein dag kvar veke på Trandum har Ezana Abebe frå Oslo – 22 år i Noreg – fått besøk av dotter si på 8 år. Ho gret og forstår ikkje kvifor pappa skal sendast ut av landet.

Dei som sit på Trandum er lengeverande asylsøkarar (papirlause) med avslag, det brotsverket dei har gjort, er at dei blir i landet fordi dei opplever at det er for farleg å dra tilbake til landet dei flykta frå. Nokre lengeverande asylsøkarar dreg og har fått opphald i andre europeiske land.

Fråvær av menneskerettar blir brukt som ­pressmiddel for å få dei til å dra. Papirlause har ikkje rett til arbeid, til skule, utdanning eller ordinær helsehjelp. Barn veks opp i ­fattigdom. Gravide får ikkje den hjelp gravide skal ha. Ein del lever i skjul, på andre sin nåde, blir utnytta. PU (Politiets ­utlendingsenhet) tvangsutsender ­lengeverande asylsøkarar i tråd med vedtatt politikk.

Yemanenettverket (som omfattar ulike organisasjonar) arbeider for å endre dagens asyl- og flyktningpolitikk på tre sent­rale område:

• Gje amnesti med opphald på humanitært grunnlag til lengeverande asylsøkarar fem år etter endeleg avslag. Sett ei grense for kor lang tid behandling av ein ­asylsøknad skal ta, med rett til varig opphald etter fem år.
• Iverksette Baumann­utvalget sitt forslag. Utlendingar med barn skal ikkje utvisast ved brot på utlendingslova. Der kor det er behov for ein reaksjon, kan det vere ei tilleggstid til butida før ein får permanent opphald.
• Innføre foreldingsfrist på 5 år i alle tilbakekallsaker som gjeld opphald og statsborgarskap.

Kanskje ein dag, tiår frå no, lenge etter mi tid, vil ein statsråd eller statsminister stå fram og seie til asylsøkarar frå sør: Orsak. Retur­politikken på 2020-talet vart ikkje gjennomført i tråd med dei verdiar vi står for, den var urimeleg. Politiske orsakingar brukar kome i ettertid.

No lagar partia sine program for 2025–2029. Kanskje kan det under skje at politikarar finn saman på tvers av skiljeliner, vedtek endringar i regelverket og set ei grense for kor lenge ein kan bu som papirlaus i Noreg.